മന്ദസ്മിതം

ഡിസംബർ 8 ലൈഫ് സ്റ്റാറ്റസ്

2011-12-11T22:31:00.000-08:00

staus on dec8 fb

‎8എട്ട് വർഷത്തെ എന്റെ ന്യൂസ് പേപ്പർ ജീവിത ഇന്നത്തോടെ അവസാനിച്ചു.നാട്ടിലും ഗൾഫിലുമായി മൂന്നുഭാഷകളിലുള്ള പത്രങ്ങൾക്കു സാങ്കേതിക സഹായം..
ശരിക്കും ആസ്വദിച്ചിട്ടുണ്ട്.ഇടക്ക് നിരാശപ്പെട്ടു,ആഹ്ലാദഭരിതനും നിശബദനുമായി.ഇറങ്ങി വരുമ്പോൾ വലിയൊരു ജീവിതം തീർന്നുപോയപോലെ തോന്നി. വാർത്തകളുടെയും
ഗോസിപ്പിന്റെയും വിവരങ്ങളുടെയുമൊക്കെ ഒരു കാലത്തെ വർണ്ണാഭമായതും അല്ലാത്തതുമായ അക്ഷരങ്ങളിൽ ഞാനുമുണ്ടായിരുന്നു.എഡിറ്റോറിയൽ ഡെസ്ക്കുകൾക്കും റിപ്പോർട്ടർമാർക്കുമപ്പുറം പത്രവ്യവസായത്തെ താങ്ങി നിർത്തുന്ന നിശ്ബദരായ ജോലിക്കാരിൽ ഒരുവനായി.നഷ്ട്ടങ്ങളിൽ ഏറ്റവും വലുത് വൈകുന്നേരങ്ങളാണു.
അസ്ത്മയങ്ങൾ കാണാത്തവർ..പുലർകാലം വരേയോ പുലരാൻ അല്പം മാത്രമുള്ളടം വരേയോ ജോലിചെയ്യുന്നവർ.വൈകുന്നേരങ്ങളിൽ തുടങ്ങുന്ന ജോലിയവർക്ക് സമയബന്ധിതമല്ലാത്ത ഒരു ലോകത്തേക്കുള്ള താക്കോൽ കൊടുക്കുന്നു.ആ താക്കോൽ ഇന്നു ഞാൻ തിരിച്ചുകൊടുത്തു. പുതിയൊരു ജോലിയിലേക്കു ഉടനെ പ്രവേശിക്കും.എന്നാലും നാം വിസ്മരിക്കുന്ന ഒന്നുണ്ട്.ലോകത്തിന്റെ മുഴുവൻ പ്രശ്നങ്ങളും നീതികേടും അസമത്വങ്ങളും എഴുതി നിങ്ങളിലേക്കെത്തിക്കുന്ന ഒരു വിഭാഗം..ഉറക്കമൊഴിഞ്ഞു ജോലിചെയ്തു ഉറങ്ങാതെയുറങ്ങി വീടുകളിലേക്കെത്തുന്ന അവർ ശരിക്കും അഭിമാനികളാണു. ശമ്പളമില്ലെങ്കിൽ പോലും നിങ്ങൾക്കായവർ വാർത്തകളെ തിരഞ്ഞു നടക്കുന്നുണ്ട് എഴുതിനിറക്കുന്നുണ്ട്.അവരൊന്നും പറയുന്നില്ല...അവരുടേതായതൊന്നുംong>>

ജീവിതത്തില്‍ ചിലത്.

2011-11-16T03:01:00.000-08:00

തുടക്കത്തിൽ

നമ്മൾ രണ്ടു വൻകരകളിൽ ആയിരിക്കും

സംസാരിച്ചു തുടങ്ങി വരുമ്പോൾ

ഭൂഖണ്ഡാതിർത്തികൾ

മഞ്ഞുരുകും പോലെ ഉരുകിപ്പോവും

പിന്നെയത്

രാജ്യാതിർത്തിയായി

ചുരുങ്ങുന്നു

ഇപ്പോൾ നമ്മൾ രണ്ടു

കരകളിലാണുള്ളത്

ഇനിയൊരു

ചെറിയ പാലം നമുക്കു

പണിയാം

അങ്ങോട്ടും ഇങ്ങോട്ടും

യഥേഷ്ഠം പാഞ്ഞുനടക്കാനൊരു പാലം.

നീയൊരു അമ്മയാണെന്നും

ഞാനൊരു അഛനാണെന്നതും

വെറും താത്വിക വിഷയം

എന്നാലും നിന്റെ

കുഞ്ഞു കരയുമ്പോഴും

എന്റെ പാതി മൊബൈലിൽ

ഒരോർമ്മകോൾ തീർക്കുമ്പോഴും

ആ പാലം ആരോ ബോംബിട്ടു തകർക്കുമ്പോലെ

തകരാറുണ്ട്....

അപ്പോഴൊക്കെ

നമ്മൾ

ഒരു ബ്ലാക്ക് ആന്റ് വൈറ്റ് ഫ്ലാഷ് ബാക്കിലേക്കു തിരിച്ചുപോവും

വെന്റിലേറ്റർ

2011-11-13T00:33:00.000-08:00

വേണമെങ്കിൽ ശ്വസിച്ചോയെന്നു
ഓക്സിജൻ കുഴലുകൾ പറയും
ഇന്നലെവരെ ചോദിക്കാതെ
അകത്തേക്കു വലിച്ചതിനു
പരാതിപ്പെടുമ്പോലൊരു
ഔദാര്യം

ദൈവത്തിനു മാത്രം മനസ്സിലാവുന്ന
സ്പന്ദനങ്ങൾ
വിവർത്തനം ചെയ്യാനുള്ള
വിഫലശ്രമങ്ങൾ നടക്കും

അടുത്ത കിടക്കകളിൽ
വാടകമുറികൾ ഒഴിഞ്ഞുപോവും പോലെ
ആത്മാക്കൾ ഒഴിഞ്ഞുപോയ ശരീരങ്ങൾ
അടക്കാൻ മറന്ന ജാലകങ്ങൾപോലെ
തുറന്നിട്ടിരിക്കുന്ന കണ്ണുകൾ

ബലാബലം നിൽക്കുന്ന ഫൈനൽ മാച്ചിലെ
എക്സ്ട്രാ ടൈം പോലെ
ആകാംക്ഷഭരിതമാവും ചിലപ്പോൾ.
ജീവിതത്തിന്റെ ഗോൾമുഖത്തേക്കു
മരണത്തിൽ നിന്നും ഒരു ഫോർവേഡ്
എല്ലാ പ്രതിരോധങ്ങളും തകർത്തു
ഓടിയെത്തിയേക്കാം
തീർച്ചയായും നിങ്ങൾക്കപ്പോൾ
വേണ്ടത്
കരുത്തുറ്റ ബാക്ക് വാഡുകളാണു

ഡോക്ടർ പറയാറില്ലേ
പ്രാർത്ഥിക്കാൻ...............

ആനുകാലിക കവിതയിൽ പ്രസിദ്ധീകരിച്ചതു ഒക്ടോബർ 2011

രണ്ടു സ്വപ്നങ്ങൾ

2011-10-13T15:19:00.000-07:00

ചിലതുണ്ട്
ചൂണ്ട കൊളുത്തുപോലെ
ചങ്കിൽ കൊളുത്തി വലിക്കും.
പിന്നെ കരക്കു പിടിച്ചിട്ട മീനിനെപ്പോലെ
പ്രാണനായുള്ള പിടപിടച്ചിലാണു.
അപ്പോൾ മരണത്തിന്റെ കുരുക്കഴിച്ചു
ഒരു നിലവിളി പുറത്തേക്കോടും
ഭീതിയുടെ കയത്തിൽ നിന്നും കരക്കു
വലിച്ചിടുമ്പോലെ കവിളിൽ തട്ടി
ചോദിക്കുന്നുണ്ടാവും അവൾ
പ്രാർത്ഥിച്ചു കിടന്നൂടായിരുന്നോ യെന്നു..
ഒട്ടും അധികമോ കുറവോ ആകാതെ
ഒന്നര മില്ലിമീറ്ററിൽ ഒന്നും മൂളും

നൂറുവട്ടം മിണ്ടാനും കാണാനും
കൊതിച്ചവൾ
അടുത്തേക്കോടിവരും
പാടുമ്പോലെ പറയും
സമയത്തെ സംഗീതമാക്കും
പാശ്ചാത്തലത്തിൽ
റാഫിയും കിഷോറും മുകേഷും
ഒരുമിച്ചൊരു പ്രണയഗാനം പാടും
ദുപ്പട്ട മറച്ചകരിനീലക്കണ്ണുകൾ
പ്രാവുപോലെ കുറുകും

എന്തിനായിങ്ങനെ ചിരിക്കുന്നേയെന്നു
ചോദിച്ചു
തട്ടി വിളിക്കുന്നുണ്ടാവുമവൾ....
സ്വപ്നത്തിനും ജീവിതത്തിനുമിടയിലെ
ഇങ്ങിനെ ചിലതട്ടി വിളിക്കലുകൾ
അനിവാര്യതയാണെന്നോർത്ത്
മെല്ലെപ്പറയും
‘പ്രാർത്ഥിച്ചാ കിടന്നത്....

മൂന്നുബോംബുകൾ

2011-09-08T08:07:00.001-07:00

-------------------------

ഒന്നുമില്ലാതെ ബോറടിക്കുമ്പോൾ
പൊട്ടാറുണ്ട് ചില ബോംബുകൾ
ആളപായമില്ലാതെ
ഏറ്റടുക്കാനാളില്ലാതെ
ചിലയിടങ്ങളിൽ..
പ്രതികളെ സാവധാനം
പേരുചേർത്തു നിരീക്ഷിച്ചു
മുയലിനെ പിടിക്കും പോലെ
മർമ്മമൊഴിച്ച് പിടിച്ചെടുക്കാം

ചിലപ്പോഴൊക്കെ
എല്ലാരും ബേജാറിലാകും
അഴിമതീന്നു പറഞ്ഞു
പത്രക്കാർ ബഹളം കൂട്ടുമ്പോൾ
കിഴവൻ കമ്മീഷനുകൾ
അത്തപ്പിത്ത പറയുമ്പോൾ
കോടതി കോട്ടുവായിടുമ്പോൾ
ദേ..ഒരൊറ്റപ്പൊട്ടൽ
തീരും ഒന്നുമുതൽ പതിനഞ്ചുവരെ..
ടീവീന്നു പൊട്ടിക്കരയും
സുരക്ഷാവീഴ്ച്ചയെന്നും
രേഖാചിത്രം പുറത്തു വിടുമെന്നും
ദേശത്തിന്റെ കെട്ടുറപ്പിനെ ചൊറിയരുതെന്നും
രാജ്യമൊറ്റക്കെട്ടെന്നും
ഒരൊറ്റപ്പറച്ചിൽ
കുപ്പികുലുക്കി
അഞ്ചുപേരിലൊന്നുറപ്പിച്ചാൽ
ഹാവൂ തീർന്നു അഴിമതി
മണ്ണാങ്കട്ട

പോവല്ലേ മൂന്നാമതൊന്നുണ്ട്
പൊട്ടാതെ കിട്ടുന്നത്
അതാരും വെക്കാം
അല്ല വായിക്കുന്ന നിങ്ങൾ വരെ

മറഞ്ഞുപോകുന്നവർ

2011-09-05T02:57:00.000-07:00

ഓഫ് ലൈൻ മെസേജ്
ഒന്നും
പറഞ്ഞില്ലല്ലോ

കണ്ടു കണ്ടു
കാണാതാവുമ്പൊ തോന്നും
വൈറസു വന്നു ബ്ലോക്കായി പോയ
ഇമെയ്ലാണോ നിന്റേതെന്നു

ബോഗൺ വില്ലപൂത്തോ
കവിതയിലിപ്പോഴും
പ്രണയത്തിന്റെ ആഗോളീകരണമുണ്ടോ
ഗുൽമോഹറിന്റെ ചുവപ്പിനാരു
പേറ്റന്റെടുത്തു,

പറഞ്ഞും ചോദിച്ചും
വരുമ്പോഴേക്കും
ദേ ബിസിയൊന്നൊരു സ്റ്റാറ്റസ് ആണു?

തൊട്ടുനോക്കിയില്ല
അടുത്തുവന്നൊരു ചായകുടിച്ചില്ല
ഒരു സിഗരറ്റുപോലും ഒരുമിച്ചു വലിച്ചില്ല
എന്നിട്ടും വിളിച്ചുപോയിട്ടുണ്ട്
സുഹ്രുത്തേയൊന്നൊരുപാടു വട്ടം

കാണുന്നവരൊന്നും അറിയുന്നുണ്ടാവില്ല
കാണാത്തവരറിയുന്നുണ്ട്
എന്നാലും പറഞ്ഞൂകൂടായിരുന്നോ
മരിക്കും മുമ്പേ ഒരു സ്റ്റാറ്റസ് മെസ്സേജ് എങ്കിലും?

.

പെരുന്നാൾ

2011-08-28T05:42:00.000-07:00

ചുളുക്കുവീണ പെരുന്നാളുകൾ
തേച്ചു നിവർത്തിയെടുക്കാൻ
എത്ര കനലാ കത്തിച്ചു
ഇസ്തിരിപ്പെട്ടി നിറച്ചതു

അയലത്തെബിരിയാണി
മണംകരളിനെ പിടപ്പിക്കുമ്പോൾ
ഉമ്മ ഒറ്റവാക്കിൽവയറുനിറച്ചു
ബിരിയാണിതിന്നിക്കും
പടച്ചോന്റെ കാരുണ്യംകടലാ മോനെ...

ആ കടലും കടന്നുപോയപ്പോഴാണൂ
കരഞ്ഞ കണ്ണുകളൊക്കെ ചിരിച്ചതും
ഞാൻ മാത്രമെല്ലാ പെരുന്നാളിനും കരഞ്ഞതും

എല്ലാവർക്കും എന്റെ ചെറിയപെരുന്നാളാശംസകൾ

പരിഭവങ്ങള്‍

2011-07-24T23:11:00.000-07:00

ഉമ്മാ..

മയ്യത്തുപോലത്തെ
മനുഷ്യന്‍മാര്‍ക്കിടയിലാ
കിടക്കുന്നത്

ഖബറുപോലെ ഇടുങ്ങിയ
കട്ടിലില്‍ കിടന്നാ
ഇക്കാണുന്ന കിനാവൊക്കെ
കാണുന്നത്

ഉറക്കം കടിച്ചുകൊണ്ടു പോവുന്ന
മൂട്ടകളാ
ഓര്‍മ്മകളെയിങ്ങനെ
പിരാന്തു പിടിപ്പിക്കുന്നത്

പെയിന്റു കൊണ്ടെഴുതിയത്
മഷിത്തണ്ടു കൊണ്ടും മായ്ക്കുന്ന
പൊട്ടനാ
ഉമ്മാന്റെ മോനിപ്പൊഴും

ഉമ്മാ..കേട്ടാലും കേട്ടാലും
പൂതി തീരാത്ത കഥ പറയ്
കേട്ടുറങ്ങുമ്പോലെ കിടക്കട്ടെ ഞാന്‍
കേട്ടു കേട്ടുറങ്ങട്ടെ ഞാന്‍ .

ആനുകാലിക കവിതയില്‍ പ്രസിദ്ധീകരിച്ചത്
http://anukalikakavitha.blogspot.com/2011/05/blog-post_3119.html

കുഞ്ഞുങ്ങളുടെ ശ്മശാനം

2011-02-13T02:30:00.000-08:00

കുഞ്ഞുങ്ങളുടെ
ശ്മശാനത്തിനു
കാവലിരിക്കുകയാണു ഞാന്‍

നിങ്ങള്‍ക്കറിയില്ല
അവരെത്രമാത്രം
ശാന്തരായാണുറങ്ങുന്നതെന്ന്

നക്ഷത്രങ്ങളുള്ള രാത്രികളില്‍
മഴവില്ലിന്റെയുടുപ്പണിഞ്ഞു
പൂവിരിയും പോലെ
പുഞ്ചിരിച്ചവര്‍ വരാറുണ്ട്
കഥകേള്‍ക്കാന്‍

നീളമില്ലാത്തരാത്രിയെ
പഴിച്ചു
തീരാത്ത കഥയുമായി
കുഴിമാടങ്ങളിലേക്കവര്‍
തിരിച്ചു പോവാറുണ്ട്

നിങ്ങള്‍ കാണുന്നില്ലേ
ശ്വാസം പോലും കേള്‍പ്പിക്കാതെ
ഉറങ്ങിപ്പോയ ശ്മശാനങ്ങളെ

ഒരോ കുഴിമാടങ്ങളും
പറയുന്നുണ്ട്
ഈ പൂവിനെയാരോ കശക്കിയെറിഞ്ഞതാണെന്നു
ആരാവാം?
അച്ചന്‍....
അധ്യാപകന്‍
അയല്‍ക്കാരന്‍
ഏയ്...ആരൊക്കെയോ

യുദ്ധവിമാനങ്ങള്‍ റാഞ്ചിയെടുത്തവര്‍
തോക്കുകള്‍ കൊത്തിപ്പറിച്ചെടുത്തവര്‍

മരിച്ചവരെപ്പോലയല്ലവര്‍
ജീവിതത്തെപ്പറ്റി
പരാതിയില്ലാതെ
പറന്നുപോയവര്‍

ഇന്നു നിലാവും
നക്ഷത്രങ്ങളുമുള്ള രാത്രിയല്ലെ
അവര്‍ വരാതിരിക്കില്ല
മഴവില്ലിന്റെ.....
പൂപോലെ.......

http://boolokakavitha.blogspot.com/2010/12/blog-post_17.html

നഗരം

2011-02-13T02:28:00.000-08:00

രാത്രികളിൽ
നഗരം പാത്തും പതുങ്ങിയും
ഗ്രാമത്തിൽ വരാറുണ്ടായിരുന്നു

ഒരോവീട്ടിലും
ഓരോദിവസവും
ജാരനായി

അവിഹിത ഗർഭങ്ങളൊക്കെ
വളർന്നു കരുത്തുള്ളവരായി

ഇന്നോരോ വീടിനും
വലിയ വേലികൾകെട്ടി
വീടെന്ന പേരൊട്ടിക്കുന്നുണ്ടവർ

ഞങ്ങളിന്നു
മിണ്ടാറില്ല
ചിരിക്കാറില്ല
കണ്ണാടികളാണു നിറയെ
ചുവരിലും വേലിയിലും

നഗരമിന്നു പകലാണു
വരുന്നത്
തലച്ചോറു കത്തുന്ന
പല്ലും നഖവുമുള്ള
യന്ത്രങ്ങളിൽ
പതിവു പറ്റുകാരായി

http://boolokakavitha.blogspot.com/2010/11/blog-post_12.html

മടക്കം

2011-02-12T06:54:00.000-08:00

പെർഫ്യൂമും
മൊബൈലുമില്ലാതെ
വന്നതുകൊണ്ടാണോ
ആളുകളിങ്ങനെ
അനക്കമില്ലാതെ
അടക്കം പറയുന്നത്?

ഓർമ്മകളും നെടുവീർപ്പുമ്മില്ലാതെ
തണുപ്പിലിങ്ങാനെ
നീണ്ടു നിവർന്നുകിടക്കുന്നത്
കാണുവാനാണോ
കല്ല്യാണവീട്ടിലെന്നപോലാളുകൾ?

ആരു കണ്ടാലും ചോദിച്ചുപോവും
പത്തു ഡ്രാഫ്റ്റെഴുതുമ്പോഴേക്കും
മഷിതീർന്നുപോയ ദുനിയാവല്ലടോ
നമ്മുടേതെന്ന്.

അകത്തൊരു പെണ്ണുജീവിതമെന്തിനാ
ഇങ്ങിനെ കരയുന്നത്?
ഖൽബിലും ഖബറിലും
ഒറ്റക്കായിപ്പോവുന്ന
ദെണ്ണം കൊണ്ടാണോ?

http://anukalikakavitha.blogspot.com/2010/11/blog-post_7727.html

തറവാട്

2010-10-06T21:47:00.000-07:00

താവഴികൾ
വിലയിലൊക്കാത്തതു കൊണ്ട്
ഇലമുഴുവൻ കൊഴിഞ്ഞുപോയ മരം പോലെ
തറവാടിങ്ങനെ
ഒരേയൊരു നിൽ‌പ്പ്.

ഉമ്മറക്കോലായുംകോളാമ്പിയും
തുണികീറിയ ചാരുകസേരയും
വല്ല്യുപ്പയെയുംവല്ല്യുമ്മയെയും
മിസ് ചെയ്യുന്നെന്നു പറയുന്നു

നങ്ങ്യാർവട്ടം വിരിഞ്ഞ നടവഴിയിൽ
ബീഡിവലിച്ചൂതുന്ന മാമ
അലക്കുകല്ലിനെ അലക്കിവെളുപ്പിക്കുന്ന
താത്ത,
കിണറ്റിന്റെ ആഴങ്ങളെ
ബക്കറ്റിൽ നിറക്കുന്ന അമ്മായി
നൊസ്റ്റാൾജിയയുടെ എസ് എം എസ്
കഴിഞ്ഞകാലങ്ങളിൽ നിന്നാരോഅയക്കുന്നതുപോലെ...

ഉമ്മ തൊടാത്ത പാത്രങ്ങളില്ലെന്നു
വീമ്പുപറയുന്നഅടുക്കള
വാപ്പച്ചിയുടെ മണം
സിംഗപ്പൂരിന്റേതാണെന്നു പറയുന്നകോവണി........

വിറകു വിലക്കു വെട്ടിമാറ്റിയ
പൂമരമേ
പൂത്തുചുവന്നപ്രണയം
തുടയിലെത്ര ചുവന്നവര
വരച്ചെന്നോർക്കുന്നുണ്ടോ?

എത്രപേരുകളിലേക്കവകാശം
മാറ്റിയെഴുതിയാലും
വായിച്ചെടുക്കാനാവാത്ത
ചിതലുതിന്നൊരടിയാധാരം പോലെകിടക്കുന്നുണ്ട്
നിന്നോടുള്ള പ്രണയമത്രയും.

ബൂലോക കവിതയിൽ പ്രസിദ്ധീകരിച്ചത്

പെങ്ങൾ

2010-10-06T21:28:00.000-07:00

മൊഞ്ചില്ലാത്തവള്‍
‍പെണ്ണായി പിറക്കരുതെന്നു
കാണാന്‍ വന്നവരൊക്കെ
പെങ്ങളെ ഓര്‍മ്മിപ്പിച്ചു

പുകയേറ്റു
മച്ചിലെ തേങ്ങപോലെ
ഉണങ്ങിപ്പോയ ഉമ്മ
അടുത്ത വിലപറച്ചിലുകാരന്
പലഹാരമുണ്ടാക്കാനേതു കടയില്‍
‍കടം പറയുമെന്ന ആധിയിലാണു
ഉപ്പ ചുമച്ചു തുപ്പുന്ന
കഫത്തിലെ ചുവപ്പില്‍
‍ചോര്‍ന്നൊലിക്കുന്നൊരു ഖല്‍ബുണ്ട്

അഴകും പൊന്നും
പണവും വേണ്ടാത്തിടത്തേക്കു
പെങ്ങള്‍ മണവാട്ടിയായി
പോയപ്പോഴാണു
ഉപ്പയൊരു സ്വകാര്യംപറഞ്ഞതു
‘ഓളെ ഖബറുംപുറത്തെങ്കിലും
ഒരു മൈലാഞ്ചിച്ചെടിനടണം

ബൂലോക കവിതയിൽ പ്രസിദ്ധീകരിച്ചത് 29/11/2009

പ്രവാസം

2010-10-06T21:24:00.000-07:00

ഋതുക്കൾ മറന്നുപോയ
താഴ്വാരങ്ങളിലാണു
ഓരോ പ്രവാസിയുടെ വീടും
പൂക്കളില്ലാത്ത ഉദ്യാനങ്ങളിൽ
അവരുടെ മക്കൾ
പറന്നു നടക്കുന്നുണ്ടാവും

പാവടക്കു നീളം വെക്കുന്നതു
മാത്രമറിയുന്നവർ
ഷോപ്പിംങ്ങ് മാളുകളിൽ
പുത്തനുടുപ്പുകൾ
തിരഞ്ഞു നടക്കുന്നു

ഓരോവിളിയിലും
പ്രണയം പ്രാർത്ഥിക്കുമ്പോലെ
പറയും
ജീവിതത്തെ കൂട്ടി തിരികേ വരാൻ,

കണക്കിൽ പിഴച്ചവർ
ഇന്നലകളെ പഴിച്ച്
ശലഭങ്ങളെ സ്വപ്നം കണ്ടുറങ്ങും

നിറങ്ങളൊക്കെ കറുത്തുപോകുമ്പോൾ
ശലഭങ്ങൾ പറന്നുപോകുമ്പോൾ
വീടകങ്ങളിലേക്കു തിരിച്ചെത്തുന്നു

എണ്ണയില്ലാതെ കത്തിതീർന്നൊരു
വിളക്കുപോലെ
ഇരുട്ടുപുതച്ചുറങ്ങിപ്പോയ
ജീവിതം
അവരോഹണക്രമത്തിലെണ്ണിത്തീർന്നുപോയ
സംഖ്യയല്ലേ
പ്രണയമെന്നു ചോദിക്കും

ബൂലോക കവിത ഓണപതിപ്പിൽ(2010) പ്രസിദ്ധീകരിച്ചത്

വിപ്ലവത്തിന്റെ വഴികളില്‍

2009-11-01T12:25:00.000-08:00

പത്തു വര്‍ഷം മുന്‍പേ കോളേജ് മാഗസിനില്‍ എഴുതിയ കവിതയാണു.
നഷ്ട്ടപ്പെട്ടുപോയെന്നു വിചാരിച്ചതാണു.പക്ഷെ സുഹ്രുത്ത് ഉഷസ്സ് മാഗസില്‍ സൂക്ഷിച്ചുവെച്ചിരുന്നു.
ഇ മെയിലില്‍ സ്കാന്‍ ചെയ്തു അയച്ചു തന്നു

ലവ് ജിഹാദ്

2009-10-18T22:41:00.000-07:00

നാവുകുഴക്കുന്ന
അറബിപ്പേരും
താടിയും നിസ്ക്കാരതയമ്പും
എത്രവട്ടം നിന്നെ
തോക്കുകള്‍ക്കൊറ്റികൊടുത്തു.

തെരുവോരങ്ങളില്‍
ചത്തുമലച്ചിട്ടും
തീവ്രവാദിയെന്ന എ പേരു
വിളിച്ചു വിളിച്ചു പേരാവുമ്പോഴും
നിര്‍ത്താറയാലില്ലെ
നിന്റെ‘ഹറാമ്പറപ്പ്’

ഒരു പശുവിനെപ്പോലും
സ്നേഹിക്കാനറിയാത്ത ഹമുക്കേ
എന്തിനാ നീ വേലിചാടുന്ന
മുഹബ്ബത്ത് കിനാവു കാണുന്നത്

അറിയാത്തവന്‍ ( ജ്യോനവന്‍ നിനക്കായി)

2009-10-04T23:59:00.000-07:00

മരണമെഴുതി
വെന്റിലേറ്ററിനകത്തേക്കു
ടാക്സിപിടിച്ചു പോയവനേ
കണ്ടിരുന്നുവോ നീ
പൂപോലെ നിന്റെ മേല്‍
‍പൊഴിഞ്ഞു വീഴുന്നപ്രാര്‍ത്ഥനകളെ.......

ആള്‍ക്കൂട്ടങ്ങളില്‍
ബഹളങ്ങളില്‍
അപരിചിതരായവര്‍
‍നമ്മളിരുവരും
പേരു പോലും ചോദിച്ചില്ലയെന്നിട്ടും
എന്റെയേതുവേനലിലാണു നീ
ഒറ്റമഴത്തുള്ളിയായിറ്റിവീണതു
പരിചിതമായിരുന്നെങ്കില്‍
ഒരുകുടക്കീഴില്‍
‍നിന്നൊപ്പമൊരു മഴക്കാലമത്രയും
നടന്നേനെ ഞാന്‍.
മരണത്തിന്റെ ഒറ്റവരിപാതയിലൂടെ
സവാരിപോയവനേ
വരികളെയെന്തിനുമറന്നുവെച്ചു
എനിക്കിടക്കിടെ വായിച്ചുകരയുവാനോ?

ഉമ്മ സ്വപ്നം

2009-09-30T07:03:00.000-07:00

പകല്‍ തിരക്കുകളില്‍
ഉമ്മ വരാറില്ല
കാത്തിരിക്കുന്നുവെന്നോര്‍മ്മപ്പെടുത്താന്‍
ജീവിതം പാതിപകുത്തെടുത്തവള്‍
‍മിസ്സ് കോളുകളടിക്കുംനേരവും
ഉമ്മയോടു മിണ്ടിയിട്ടെത്ര
കാലമായെന്നോര്‍ക്കാറില്ല.

വാക്കിനെ മെരുക്കി
കവിതയാക്കിയൊന്നടുക്കിവെക്കുവാന്‍
‍രാവിലുറങ്ങതിരിക്കുമ്പോഴും
ഉമ്മമാത്രമൊരു വരിയായെത്തുന്നില്ല

എന്നാലുംപനിച്ചും ചുമച്ചും
ദുസ്വപ്നങ്ങളില്‍ ‍ഒറ്റക്കുറങ്ങുമ്പോള്‍
‍നിറുകയില്‍ ചുംബിച്ചുറാങ്ങാതെ
നീറുന്നൊരുമ്മ സ്വപ്നം
കാതുനോവിക്കാതെപ്രാര്‍ത്ഥിക്കാറുണ്ട്
ദെണ്ണം മാറുംവരെയും
കണ്ണടയാതെ കൂട്ടിരിക്കാറുണ്ട്

സ്വാതന്ത്ര്യം

2009-08-13T08:59:00.000-07:00

പതാകയുയരുമ്പോള്‍‍

പായസത്തിനുള്ളകാത്തിരിപ്പു,

എട്ടണയുടെകടലാസു കൊടി

പിഞ്ഞിപ്പോയകീശപ്പുറത്തു

ആരും കാണാതെ,

അമ്മയ്ക്കു

ചോറ്റുപാത്രത്തിലൊളിപ്പിച്ചമധുരം

സ്വാതന്ത്ര്യത്തിനുഅച്ഛന്‍

ചോരവാര്‍ന്നൊടുങ്ങിയപ്പോള്‍‍

സ്കൂളിലിലൊരോമനപ്പേര്

‍ചോരപാത്തി

വിശപ്പടക്കാന്‍‍

വിറ്റുതീര്‍ന്നുപോയ പെങ്ങള്‍

സ്വാതന്ത്ര്യം ചോദിച്ചപ്പോള്‍

വയറ്റില്‍അധികാരത്തിന്റെ

ബയണറ്റ്കുത്തിതന്ന ചാപ്പ

അഴികള്‍ക്കു പിന്നിലൊതുങ്ങിപ്പോയരോഷം

എന്നാലുംനാളെ ഞാനും പാടും

പോരാ പോരാ നാളില്‍ നാളില്‍....

സ്വാതന്ത്ര്യദിനാശംസകള്‍

മാഷ്

2009-03-25T08:20:00.000-07:00

വെളുക്കെച്ചിരിച്ചു
വിശേഷം ചോദിച്ചു
കാലന്‍ കുടചൂടി
ഇസ്തിരിയിട്ട നടത്തവുമായി
നാട്ടുകാരുടെ മാഷ്

ശരിയുത്തരത്തിനുമിഠായി
തെറ്റിയാല്‍ ചെവിയില്‍
‍നോവാതെ നുള്ളി
കഥയിലെ ആമയും മുയലുമായി
കുട്ട്യോള്‍ടെ മാഷ്

എഴുതിയും
വായിച്ചും
ഉപദേശിച്ഛും
അടുക്കളത്തോട്ടത്തില്‍
‍തൊഴുത്തില്‍
വീട്ടുകാരുടെ മാഷ്

സ്കൂളും കുട്ട്യോളും
കണ്ണടയും കരയുമ്പോള്‍
‍പെന്‍ഷന്‍ മാഷായി
മാഷ് വെളുക്കെച്ചിരിച്ചു

ഭ്രാന്ത്,ഭ്രാന്താശുപത്രി

2009-02-13T06:28:00.000-08:00

കാണുന്നവര്‍
‍നോക്കുന്നവരൊക്കെയും
ഭ്രാന്തന്‍മാരാകുന്നിടം
ഭ്രാന്താശുപത്രി

ചങ്ങലയോട് കയര്‍ത്ത്
കാലുവ്രണപ്പെട്ടവര്‍
വ്രണിതമന്‍സ്സിലേക്കാര്‍ക്കുന്ന
ഈച്ചയെ ആട്ടിത്തെളിക്കുന്നു

ജീവിതം താഴേക്കുരുട്ടി
ആര്‍ത്തട്ടഹസിക്കുന്നവര്‍,
കരയുന്നവര്‍,
ചിരിക്കുന്നവര്‍
ഏതുപാട്ടിനാണീണം
തെറ്റിയന്നറിയാതവര്‍
‍പാടുന്നുണ്ട്,
പ്രണയഗാനം,
വിപ്ലവഗീതം,
താരാട്ടുപാട്ട്.

ആര്‍ക്കും തല്ലിച്ചതക്കാമവരെ
എറിഞ്ഞോടിക്കാം
ഭ്രാന്തന്റെ
പക്ഷത്തുനിന്നാരുംവരില്ല
ന്യായവാദങ്ങളായി

ശല്യമേറുമ്പോള്‍
‍കെണിവെച്ചുപിടിച്ചെലിയെപ്പോലെ
കറന്റടിപ്പിച്ചു കൊല്ലാം
അക്രമാസക്തരാണവര്‍
‍ചിത്തഭ്രമക്കാര്‍

‍സന്ദര്‍ശകര്‍ വരാറില്ല
കത്തയക്കാറില്ല
കുശലാന്വേഷണമില്ല

നാറും മുമ്പേ
എടുത്തു മാറ്റുവാന്‍
ഇടക്കു വരാറുണ്ടത്രെ
പഴയൊരാംബുലന്‍സ്.

അര്‍ബുദവാര്‍ഡ്

2008-12-24T03:14:00.000-08:00

കരിക്കുംതോറും
പുനര്‍ജ്ജനിക്കുന്ന
കോശങ്ങളെപ്പോലെ
അര്‍ബുദവാര്‍ഡ്
ഒഴിയും തോറും
നിറയുന്നു

കിടക്കകളില്‍‍
മരണത്തെ കാത്തുകിടക്കുന്നവര്‍‍
വിധിയോട്ചോദ്യം
ചോദിച്ചു കൊണ്ടേയിരിക്കുന്നു

വേദനക്കു
കൂട്ടിരിക്കുന്നവര്‍‍
നിശബ്ദമായി പ്രാര്‍ഥിക്കുന്നു.
ദൈവമേ....
മരണത്തെക്കൊണ്ടിവരെ
അനുഗ്രഹിക്കുക.

ഒരോ റേഡിയേഷനിലും
പ്രതീക്ഷയുടെ നാമ്പു മുളപ്പിക്കുന്നവര്‍
തിരിച്ചുപോക്കിന്റെതിയ്യതി
കുറിച്ചിരിക്കുന്നു.

ജീവിതം കൈവിട്ടുപോയവര്‍‍
മരണത്തിന്റെ കണ്ണാടിനോക്കി
നിസ്സഹായരാവുന്നു

രാത്രി
കൂട്ടുവന്നവരുറങ്ങുമ്പോ
‍അര്‍ബുദ വാര്‍ഡില്‍
‍രോഗവും രോഗിയും
തനിച്ചാവുന്നു

ജീവിതവും മരണവും
കടിപിടി കൂടുന്നിടത്ത്
ആരും കേള്‍ക്കാത്ത നിലവിളികള്‍
മാത്രംബാക്കിയാവുന്നു.

പട്ടാളക്കാരന്റെ ഭാര്യ

2008-09-26T02:49:00.000-07:00

പട്ടാളക്കാരന്റെ ഭാര്യ
അതിര്‍ത്തിയിലെ
ഓരോ വെടിവെപ്പിലും
ഒരായിരം തവണ
വെടിയേറ്റു പിടയാറുണ്ട്

വൈധവ്യത്തിന്റെ
വെളുത്തനൂലിനാല്‍ നെയ്ത
കല്ല്യാണപ്പുടവ
ഇടക്കൊക്കെയെടുത്തു
മണക്കാറുണ്ട്
മധുവിധുവിന്റെയൊരു
പൂമണത്താല്‍
ഒരുമിച്ചുള്ളോരു
വസന്തമോര്‍ത്തു
അടുത്തൊരവധിക്കാലത്തിനായുള്ളൊരു
കാത്തിരിപ്പ്

ഇടക്കുവരുന്ന
കത്തുകളില്‍
നേരില്‍ കാണനൊരു
പ്രാര്‍ഥന
ആയുര്‍ബലത്തിനായൊരു
നേര്‍ച്ച
കൈവിട്ടു പോവാത്തൊരു
മനോധൈര്യം

യുദ്ധത്തിലപഹരിക്കപ്പെട്ടവന്‍
കറുത്തയക്കങ്ങളില്‍
ചൂടപ്പമവുമ്പോള്‍
കാണാറുണ്ട് ഞാന്‍
അയലത്ത്
പൂജാമുറിയില്‍
കണ്ണീര്‍ നേദിച്ചുപ്രാര്‍ഥിക്കുന്ന
പട്ടാളക്കാരന്റെ ഭാര്യയെ.....

ഓര്‍മ്മയിലൊരോണം

2008-08-27T11:28:00.000-07:00

ഓര്‍മ്മയിലെ
ഓണത്തിനു,
അലക്കിയലക്കി
മങ്ങിപ്പോയ
കുപ്പായത്തിന്റെ നിറമാണു.
അടുപ്പിലൂതിയൂതി
കറുത്തുപോയ
അമ്മയുടെ മുഖമാണു.

തുമ്പപ്പൂവും
കാക്കപ്പൂവും തീര്‍ത്ത
പൂക്കളം കാണുവാനൊരു
മഹാബലിയും വന്നില്ല.

ഉണ്ടു തീരാതെ
നാക്കില വലിച്ചെറിഞ്ഞവര്‍‍
കഞ്ഞിയില്‍ വറ്റില്ലമ്മേയെന്ന
വിലാപം കേട്ടില്ല.

ഓര്‍മ്മയിലോണത്തിനു
ഊഞ്ഞാലില്ല
പാട്ടില്ല
കൈകൊട്ടി കളിയില്ല.

ഇന്നൂണുണ്ടു
ഉടുപ്പുണ്ടു
എനിക്കോണം മാത്രമില്ല.

തെരുവ്‌..

2008-07-30T08:16:00.000-07:00

പകലുറങ്ങി
രാത്രിയിലുറങ്ങാതെ
ഒഴുക്കുനിലച്ചോവുചാലുകള്‍-
ക്കിരുവശമെന്റെ തെരുവുണ്ടു.

പകലൊന്നു മങ്ങിടുമ്പോള്‍‍
ജാലകം തുറന്നെത്തും കാഴ്ചകള്‍‍
ഇരമ്പിയാര്‍ക്കുന്ന വാണിഭങ്ങള്‍.

മുല്ലപ്പൂചൂടി,മനം പുരട്ടി ചിരിച്ചു
മകുടിയൂതിയുണര്‍ത്തി
ലേലം വിളിച്ചു വിലയുറപ്പിച്ചു
ഇരുളിലേക്കൂളിയിടുന്ന
തെരുവു വേശ്യകള്‍

ആണിനൊരാണ്‍ തുണ
തേടിയെത്തുന്നവര്‍
ചമഞ്ഞൊരുങ്ങി,
കണ്ണുകളിരുവശംപായിക്കുമൊരുവന്റെ
കൈപിടിച്ചൊരുക്കിയ
കിടപ്പറയിലേക്കു നടക്കുന്നു.

കുഞ്ഞിനെ പറിച്ചെടുക്കും
കഴുകനെമറച്ചു മുലകൊടുക്കുന്നമ്മമാര്‍
ചിറകിലേക്കൊതുക്കിയുറങ്ങാതെ
നെഞ്ജിടിപ്പോടെ.

സൂചിമുനയായി
കണ്ണിലേക്കിറങ്ങുന്ന തെരുവിളക്കിനെ
പാഴ്ചാക്കിനാല്‍ മറച്ചുറങ്ങുന്നവര്‍ ‍
വെളിവാകുമിരുകാലിനെ
ആര്‍ത്തിയൊടെ നോക്കിനില്‍ക്കുന്നവര്‍

‍ഉറങ്ങുന്നവരില്‍ കള്ളനെതിരയുന്ന
രാത്രികാവല്‍ക്കാര്‍
ലാത്തികൊണ്ടു കുത്തിപിടപ്പിച്ചു
ചിരിക്കുന്നു ആഭാസമായി

വിശപ്പിനെത്താത്ത
പിച്ചനാണയത്തുട്ടുകള്‍‍
എണ്ണിയും വീണ്ടുമെണ്ണിയും
വിശപ്പിനെ തിന്നുറങ്ങുന്ന
കുഷ്ട രോഗികള്‍

വിലകുറഞ്ഞ ലഹരിക്കു
വീര്യം കുറയുമ്പോള്‍
പുലഭ്യം പറയുന്നവര്‍ ‍
വെളുക്കും വരെ

എന്റെ തെരുവിങ്ങനെയെന്നും
പുലരുന്നു കറുക്കുന്നു,
മാറ്റമില്ലാതൊരുനാളുമെങ്കിലും...
തെരുവിനോരത്തുറങ്ങും
അച്ചന്റെ വെപ്പുകാലിനരികിലായി
ചിത്രതൂവാലകള്‍ തുന്നുന്നൊരു പെണ്‍കുട്ടി..
ഇപ്പൊഴുമുറങ്ങാതെ...
ആര്‍ക്കോവേണ്ടി.........

അമ്മ

2008-07-07T08:28:00.000-07:00

അമ്മയെ കണ്ടില്ലൊരിക്കലും
തിരക്കൊഴിഞ്ഞു..

അടുക്കളയില്‍,തൊടിയില്‍
ഉമ്മറക്കോലായില്‍‍
അച്ചന്റെ ചാരുകസേരക്കുപിറകില്‍
അമ്മയെ കണാത്തൊരിടമില്ല.

അമ്മയൂട്ടിവിരുന്നുകാരെ
വീട്ടുകാരെ.

അച്ചന്റെ ശകാരം കേട്ടു
ഉപ്പു കുറഞ്ഞതിനു
മുളകു കൂടിയതിനു
കഞ്ഞിപ്പശ മുക്കാന്‍ മറന്നതിനു...

വഴക്കു കൂടി ,ബഹളം വെച്ചു
സഹായിയായി ഞങ്ങളും..

എല്ലാം അമ്മയോടുചോദിച്ചു
അമ്മയെപ്പറ്റിയൊഴികെ

അമ്മ ശാസിച്ചു
തലയിലെണ്ണതേക്കാത്തതിനു
വെയിലില്‍ വാടിവന്നപ്പോള്‍
പനികിടക്കകളില്‍
അമ്മയുംകൂടെ പൊള്ളി പനിച്ചു.
നുള്ളിപെറുക്കിഅമ്മകൂട്ടിയ
നാണയതുട്ടുകള്‍
ഉത്സവകാഴ്ചയായി

അമ്മയ്ക്കു സ്വന്തമായി
കരിഞ്ഞ കൈതപ്പൂ മണമ്മുള്ളൊരു
തുരുമ്പിച്ച തകരപ്പെട്ടി
നിറം മങ്ങിപ്പോയൊരു
പഴയ സാരി
......................
........................
.........................
.............
ഇന്നലെയായിരുന്നു
അമ്മമരിച്ചതു.

ചോദ്യം

2008-06-21T07:46:00.000-07:00

വൈകിവരുന്നവനു
പിന്നാമ്പുറത്തൊരുവാതില്‍
തുറന്നുറങ്ങാതിരിക്കുന്നൊരമ്മ.

ഒച്ചയനക്കങ്ങളമര്‍ത്തിനടക്കുമ്പോള്‍
കണ്ണടച്ചുറങ്ങാതെ
വാതിലടയുന്നതും
കാത്തിരിക്കുന്നൊരച്ചന്‍

പുസ്തകത്തില്‍ കണ്ണുനട്ടവനു
കാല്‍ വെള്ളവെള്ളത്തിലാഴ്ത്തി
ഉറങ്ങാതെ കൂട്ടിരിക്കുന്നൊരു പെങ്ങള്‍.

ഉരുളി,കോളാമ്പി,ചിറ്റ്‌,താലിമാല
വല്ല്യയാളായിക്കാണുവാന്‍
പണയപ്പെടുത്തിയും വിറ്റും

പിന്നെയെവിടയാണു
ശ്രുതി താളങ്ങള്‍ പിഴച്ചത്‌
ഉത്തരത്തിലിങ്ങനെ തൂങ്ങിയാടാന്‍ ?

അല്‍ഷിമേഴസ്‌

2008-06-14T08:09:00.000-07:00

ഓര്‍മ്മകള്‍ക്കാണു മറവി
അസമയത്തു മുഖം കാണിച്ചു
സമയത്തു വരാന്‍ മടിച്ചു
ഓര്‍മ്മപെടുത്തരുതു
ഇനിയുമോര്‍മ്മിക്കാന്‍.

അച്ചനെ എണ്ണം പഠിപ്പിക്കാന്‍‍
അക്ഷരം ചൊല്ലിക്കാന്‍‍
തിടുക്കം കൂട്ടുന്ന മക്കള്‍.
മാറിനിന്നു ചിരിക്കാം നിങ്ങള്‍ക്കു
മറവിയില്‍ മനം പിടഞ്ഞുകരയാനുമാവാതെ....
ഇല്ല ഇനി തുടര്‍ച്ചയില്ല
മറന്നവ ഇടര്‍ച്ചയാവുന്നു

കയ്യൊപ്പു വേണ്ട
വിരലടയാളം മതിയെന്നു
പോസ്റ്റുമാന്‍....
വരിചേര്‍ന്നു
വിടപറഞ്ഞിറങ്ങുന്നതുഓര്‍മ്മകളല്ല...
ഞാന്‍ തന്നെ.
നടന്നു തീര്‍ത്തതും പറഞ്ഞതും
പറഞ്ഞുതീരാതെയും....
കരഞ്ഞു പോവുന്നു.
വാക്കുകള്‍ക്കൊപ്പം ഞാനും.

കണ്ണുനനച്ചുപിറകിലേക്കൊതുങ്ങി
എന്തിനിങ്ങനെഒന്നും പറയാതെ
ഇലപൊഴിഞ്ഞു വീഴുമൊരുമരത്തിനു
മൂകസാക്ഷിയായി നീ.........

കാണാതാവുന്ന പെണ്‍കുട്ടികള്‍

2008-06-05T01:03:00.000-07:00

സരള,ശാരദ,സൈനബ
അവസാനം കാണ്മാനില്ലാത്തതു
ഇവരാണത്രെ.

വെളുപ്പിനിറങ്ങിയവള്‍,
ഉച്ചക്കു തയ്യലിനു പോയവള്‍
വൈകീട്ടു ചന്തക്കു പോയവള്‍
ഇറങ്ങിയ സമയമിങ്ങനെ
തരം തിരിച്ചിട്ടും
ആരും തിരിച്ചെത്തിയിട്ടില്ല.

ഡ്രൈവറാണത്രെ കാമുകന്‍,
പാറപ്പണിക്കാരന്‍ തമിഴന്‍
നോക്കിച്ചിരിച്ചത്രെ..
കുപ്പിവളക്കാരനോടു
കിന്നാരം പറഞ്ഞത്രെ...

കേസുപുസ്തകം മറിച്ചിട്ടും
വീണ്ടും പേരു ചേര്‍ത്തും
ഏമാന്മാര്‍ കേസിനൊരു
തുമ്പുതപ്പി,ഒടുക്കം പറഞ്ഞൂ..

വിറ്റുപോയിട്ടുണ്ടാവും ചന്തകളില്‍
തീരത്തു വീര്‍ത്തടിഞ്ഞീട്ടുണ്ടാവും
തിരിച്ചറിയാതെ....

വിതുമ്പിക്കരഞ്ഞൂ അമ്മമാര്‍
പെറ്റവര്‍ക്കറിയാം നൊമ്പരം
പെണ്ണൊരുത്തി
പടിയിറങ്ങിപ്പോയതിന്റെ..

ഷൈലജ,നഫീസ,....
കാണാതയതല്ല
കണ്ടവരെയാണത്രെ
കാണാതായതു.

എന്റെ ഈ കവിതക്കു പവിത്രന്‍ തീക്കുനിയുടെ വാണിഭം എന്ന കവിതയുമായി സാമ്യതകാണുന്നുണ്ടു.കാണിച്ചു തന്ന അനോണി ക്കും ഷംസിനും നന്ദി.
ഇനി ഈ പോസ്റ്റ് ഒഴിവാക്കണമോയെന്നു വായനക്കാര്‍ക്കു തീരുമാനിക്കവുന്നതാണു.
പവിത്രന്‍ തീക്കുനിയുടെ കവിത യുടെ ലിങ്ക് താഴെ കൊടുത്തിരിക്കുന്നു.

http://indulekha.com/malayalambooks/2006/10/theekkunikkavithakal

ബ്ലാക്ക്‌ ആന്റ്‌ വൈറ്റ്‌

2008-03-09T23:56:00.000-07:00

വെളുപ്പുപടര്‍ന്ന
ബ്ലാക്ക്‌ ആന്റ്‌ വൈറ്റ്‌ ഫോട്ടോകളില്‍
‍അവനുണ്ട്‌..
പട്ടം പറത്തി
മിഠായിതിന്നു
കുട്ടിയുടുപ്പിട്ടു
പൊടിമീശവെച്ചു...

അച്ചനുണ്ട്‌
അമ്മയുണ്ട്‌
അവനെയെടുത്ത്‌
ചേര്‍ന്നുനിന്നുപൊട്ടിച്ചിരിച്ചു...

വീടുണ്ട്‌
പഴയവഴിയുണ്ട്‌
പൂവാലിപ്പശുവുണ്ട്‌
പാടമുണ്ട്‌ തെയ്യമുണ്ട്‌
ഓണപ്പൊട്ടനുണ്ട്‌....

കളറിലിപ്പോഴൊരു
ഇലക്‌ട്രിക്ക്‌ ചിതയുണ്ട്‌ .

വാലന്റൈന്‍ കവിതകള്‍

2008-02-11T02:56:00.000-08:00

പ്രണയമെന്നു പേരിട്ടൊരു
പൂവുതരാം
മൊബെയിലിലെക്കൊരു
സന്ദേശമയക്കാം
ഉപഹാരമായി നിന്റെ
പ്രിയചാനലിലൊരു
പാട്ടു സമര്‍പ്പിക്കാം
സ്പോണ്‍സറെ കിട്ടുമെങ്കില്‍‍
ഒരു മരണകുറിപ്പെഴുതി
നിനക്കായൊന്നു പൊലിഞ്ഞിടാം.

* * * * * * * * * * * * * * * * * *
നിന്റെ സ്വരത്തെ
മുഖത്തെ
ഹൃദയത്തുടിപ്പുകളെ
എന്നേക്കാളേറെയറിയാം
എന്റെ സെല്‍ഫോണിനു
ഞാന്‍ മറന്നാലും
നിനക്കായൊരു
സന്ദേശമതുമറക്കില്ല.

*********************
പ്രണയദിനത്തില്‍
നമുക്കൊന്നു പ്രണയിക്കാം
പ്രണയിച്ചു പിരിഞ്ഞിടാം
പിരിഞ്ഞിട്ടു പാടിടാം
പ്രണയഗാനം.

‍ചൂത്‌

2008-02-10T02:54:00.000-08:00

കള്ളകരുക്കളെ കൊണ്ടു
തന്നെ നീ കളിക്കുക
നിന്റെ രാജധാനിയില്‍
ഇനിയും ഞാന്‍ വരും
തോല്‍ക്കുവാന്‍
തോറ്റുകൊണ്ടേയിരിക്കാന്‍
‍തവണകളെത്ര തന്നിട്ടും
നിനക്കു തരാനുള്ളത്രയും ബാക്കി
ശിഷ്ടം നഷ്ടമാവുന്ന കണക്കു പുസ്തകങ്ങളില്‍
‍ഗുണിച്ചും ഹരിച്ചും വെറുതെ.

കവിതയും ഞാനും
വഴി പിരിയുന്നിടം
നീ എനിക്കായി
ഒരു പേനതരണം
വെട്ടിയും തിരുത്തിയും
നിന്റേതു മാത്രമാവാനൊരുകവിത തരാനല്ല
വെറുമൊരു ഫുള്‍സ്റ്റോപ്പിടാന്‍

ഓള്‍ഡ് CAREHOME

2008-02-09T00:24:00.000-08:00

അഛനുമമ്മയ്ക്കും
ഞാനൊരഡ്മിഷനെടുത്തിട്ടുണ്ടു
കോഴയും ശുപാര്‍ശയുമായി
ലക്ഷമൊന്നര കൊടുത്തുവെങ്കിലും
സൗകര്യങ്ങളിത്രയാരു തരുവാന്‍..?
നീന്തല്‍ മറക്കാതിരിക്കനൊരു സ്വിമ്മിംങ്ങ്പൂള്‍.
ഇടക്കൊന്നുലാത്താന്‍ പൂന്തോട്ടമുണ്ടു
വെജും നോണ്‍ വെജ്ജും ഭുജിച്ചിടാം മാറിമാറി
ഭോജനശാലയുണ്ടു നല്ലൊരണ്ണമവിടെ.
അഛനിടക്കൊന്നു വേണമെങ്കില്‍
മിനുങ്ങിടാം ,കളിച്ചിടാം
ക്ലബ്ബുകളുണ്ടെ രണ്ടെണ്ണം

ഇറങ്ങിടാം...
നല്ലൊരു നേരം നോക്കി കാലത്തു,
മറക്കെരുതെടുക്കാന്‍
ഓര്‍മ്മകള്‍ പൂട്ടിവെച്ച പെട്ടിയും
മഞ്ജാടിമണികളും
കൊച്ചുമോന്റെ കൊഞ്ജലുകള്‍
കേള്‍ക്കുവാനുള്ള വാക്മാനും
കാച്ചിയെണ്ണ ,കസവുമുണ്ട്‌
ഭാഗവതം ,രാമായണമൊക്കെയും
ബാഗിലുണ്ടു ഭദ്രമായി.
കൂട്ടുകൂടാനുണ്ടവിടെയൊത്തിരിപ്പേര്‍
എഴുപതു കഴിഞ്ഞവര്‍ .

സന്തോഷിക്ക
അച്ച്നനുമമ്മയും
മകനിവനിത്രയെങ്കിലും......?

വിപ്ലവം(ADB)

2008-02-07T07:07:00.000-08:00

വ്യഭിചരിക്കപ്പെട്ട
വിപ്ലവമേ...
കരഞ്ഞിട്ടു കാര്യമില്ല
കൂട്ടികൊടുത്തതും അവര്‍തന്നെ
ചോരചുമച്ചു തുപ്പിയനെഞ്ജിന്‍ കൂടകം
പടുത്തുയര്‍ത്തിയ കനകസിംഹാസനത്തില്‍
‍തഴമ്പു പൊട്ടും വരെ ഇരിക്കട്ടെ
ഇരുന്നവര്‍ ചിരിക്കട്ടെ
നാലുസെന്റീമീറ്റര്‍ നീളത്തിലൊരു ചിരി.

മോര്‍ച്ചറി

2007-07-14T07:53:00.000-07:00

കാത്തിരിപ്പു അസഹ്യമാവുന്നവര്‍
മോര്‍ച്ചറിക്കു പുറത്തു
പിറുപിറുത്തും
വിരലുകള്‍ ഞെരിച്ചും ...
എത്ര കത്തിച്ചിട്ടും
അണഞ്ഞു പോവുന്ന ബീഡിക്കുറ്റി
തീപ്പെട്ടിയുരച്ചും വീണ്ടുമുരച്ചും
കാറ്ററിയാതെ കത്തിക്കുന്ന
മോര്‍ച്ചറി സൂക്ഷിപ്പുകാരന്‍

അകത്ത്‌..
മരണത്തിന്റെ മൗനത്തില്‍
ഡെറ്റോളും ഫിനോയിലും
ഒരുമിച്ചൊരു ഗന്ധമാവുന്നു..
റാക്കുകളില്‍
കാത്തിരിക്കുന്നു ശവങ്ങള്‍..
തുടമാന്തിപ്പൊളിച്ചുകണ്ണുതുറിച്ചതു..
തലയുമുടലും ചേരാത്തതു,
വിഷംകുടിച്ചളിഞ്ഞുപോയതു,
താളംതെറ്റിയോടിയ ജീവിതത്തില്‍ നിന്നും
തെറിച്ചു വീണതു,
പാളങ്ങളില്‍ അരഞ്ഞു പൊയതു,
പറിച്ചു ചീന്തിയതു.....
മരിച്ചു കഴിഞ്ഞാല്‍ ഒരേ പൊലെ
ഒരേ പേരു ....ശവം

ആവശ്യക്കാരില്ലാതതു
പഠനമുറികളിലേക്കു..
പൊതു ശ്മശാനത്തിലേക്കു...

നിലവിളികളും
അടക്കം പറച്ചിലുകളുമായി
വരുന്നവരെ കാത്തു..
മിഠായികടലാസു കൈവെള്ളയില്‍
മുറുക്കിപിടിച്ചു...
റോഡില്‍ ചിറകറ്റുവീണൊരുകുഞ്ഞുശലഭം...

മോര്‍ച്ചറി സൂക്ഷിപ്പുകാരനിപ്പൊഴും..
കാറ്ററിയാതെ..
കൈപൊത്തി തീപ്പെട്ടിയുരച്ചു............

ഉമ്മാമ പറഞ്ഞ കഥ

2007-07-12T00:55:00.000-07:00

പുഴക്കരയിലെ പഴയ പള്ളി
വാതങ്കൊല്ലി പടര്‍ന്ന മീസാന്‍ കല്ലുകള്‍
കാടുപിടിച്ച
മരിച്ചവരുടെ ഖബറുകള്‍
മരിക്കാത്തവരുടെ ഖബറുകള്‍
കുഴിച്ചു,മണല്‍ നിറച്ചു,
എനിക്കു നിനക്കു...
ഞമ്മള്‍ക്കെല്ലാമായി.

ഇരുട്ടിനെ പേടിക്കുമ്പോഴൊക്കെ
ഉമ്മാമ പറയും..
ഇതിരുട്ടല്ല..
ഖബറിലെ ഇരുട്ടാ ഇരുട്ടു.

ആ ഖബറുതന്നെ....
മൊല്ലാക്ക വിരല്‍ ചൂണ്ടുമ്പോള്‍
അത്തറിനു മയ്യത്തിന്റെ മണം.
ഉമ്മാമ പറഞ്ഞ കഥകളിലെ
മയ്യത്തിന്റെ മണമുള്ള മൊല്ലാക്ക.
ബാങ്കു വിളിച്ചു, വിളിച്ചു
പറയുന്നതൊക്കെബാങ്കാവുന്നു.

പുഴക്കും പള്ളിക്കുമിടയില്‍ ഞാനിപ്പൊഴും.
പുഴപറയാന്‍ തുടങ്ങിയാല്‍
ചോദിക്കണമെനിക്കു
ചുഴിയിലേക്കു ആഴ്ത്തിക്കളഞ്ഞ
പെങ്ങളെപ്പറ്റി.
ഒളിപ്പിച്ചുവെച്ച നീരാളികൈകളില്‍
കുരുങ്ങി പിടഞ്ഞ കിനാവിനെ പ്പറ്റി.

പുഴ പള്ളി ഉമ്മാമ
ഇടയില്‍ എത്ര തുഴഞ്ഞിട്ടും..
നീങ്ങാത്ത തോണിയില്‍ ഞാനും.
തുഴക്കോല്‍ നല്ലതല്ലെന്നു പറഞ്ഞതു നീയാണോ?

കാടു കയറിപ്പോയ ഖബറുനോക്കി
മൊല്ലാക്ക ഇപ്പോഴും.

പുഴക്കും പള്ളിക്കുമിടയില്‍ ഞാനിപ്പോള്‍
ഉമ്മാമ പറയുന്ന കഥയാവുന്നു.

പേറ്റന്റ്‌

2007-06-17T00:28:00.000-07:00

എനിക്കു വേണം പേറ്റന്റ്‌
അമ്മയുടെ കണ്ണുനീരില്‍നിന്നും
ഉപ്പു വാറ്റാന്‍
മുലപ്പാലില്‍ നിന്നുംബിസ്കറ്റ്‌....
താരാട്ടിനൊരുപകര്‍പ്പവകാശം .

എനിക്കു വേണം
നിന്റെ ആധികള്‍
ഉത്ക്കണ്ടകള്‍...
നമുക്കൊരു പോളിസികൂടി എടുക്കാം
എന്നിട്ടു മതി സ്വപ്നങ്ങള്‍ .

പഴയകത്തുകള്‍

2007-04-25T00:11:00.000-07:00

പഴയ കത്തുകള്‍
വാക്കുകള്‍ക്കിപ്പൊഴും
പുതുമണം.

വരികള്‍ കണ്ണിലലിയുമ്പോള്‍
ഖല്‍ബില്‍ ഓര്‍മ്മകളുടെ ഒപ്പന.
കണ്ണിമചിമ്മാതെ
എഴുതിയതില്‍ നിറയെ
നിന്റെ പിടച്ചിലുകള്‍
കരച്ചിലുകള്‍....
വായിച്ചു,വായിച്ചു
എന്റെ കണ്ണുണങ്ങി
എന്നൊപ്പം മരുഭൂമിയും
കത്തുമ്പോള്‍
നിന്റെ കത്തില്‍
മഴപെയ്തുതോര്‍ന്നു
മഞ്ഞുവീണു
മാവുപൂത്തു
അസര്‍മുല്ലകള്‍
‍വിരിഞ്ഞും കൊഴിഞ്ഞുമിരുന്നു.

മടക്കയാത്രയെ ഓര്‍മ്മിപ്പിക്കുന്ന
പുതിയ കലണ്ടറുകള്‍
പറഞ്ഞുതീരാത്ത രാത്രികള്‍ക്കയി
നിന്റെ കാത്തിരിപ്പു....
അപ്പോഴൊക്കെ ഞാനുമെഴുതി
എത്രവെള്ളമൊഴിച്ചിട്ടും
കരിഞ്ഞുപോവുന്ന മൈലാഞ്ചി
ചെടികളെപ്പറ്റി...
കേള്‍ക്കാനുരുമില്ലെങ്കിലും
ഉറക്കെ പാടി
കത്തില്‍ സ്നേഹക്ഷരങ്ങള്‍
കുത്തിനിറച്ചു..

രണ്ടു കരകളില്‍
‍ഒരേ വഞ്ചിക്കുള്ള കാത്തിരിപ്പു...
ഒരേ നെടുവീര്‍പ്പുകള്‍
തലയും നെഞ്ചും നരച്ച്‌...
താളുകള്‍ കീറിത്തീര്‍ന്ന
ചെക്കുബുക്കായി ഞാനും ...

ഇന്നു രാത്രിയും ഞാന്‍ വായിക്കും
നിന്റെ പഴയകത്തുകള്‍

പ്രണയവിവാഹം

2007-04-07T05:39:00.000-07:00

അന്നുകണ്ട നീലിമയൊന്നുമീ
കണ്ണിനിന്നില്ല
പൂക്കാലം തന്നെയന്നു
പൂ പോലുമല്ലിന്നു.

കാത്തു കേള്‍ക്കാന്‍,
കൊഞ്ജി നീ മൊഴിയുമ്പോള്‍
മധുമൊഴിയെന്നത്ര വട്ടം മൊഴിഞ്ഞു
പറയട്ടെ കര്‍ണ്ണ കഠോരമെന്നു
പതിയെ നീ പറഞ്ഞാലുമിന്നു.

കഥ പറഞ്ഞുറങ്ങാത്ത
രാവുകളെത്ര വേഗം മറഞ്ഞു
പറയാതെ,നെടുവീര്‍പ്പുമായി
തിരിഞ്ഞു കിടന്നു കൂര്‍ക്കം വലീക്കുമീ
രാവുകളിനിയെത്ര താണ്ടണം.

പുകപിടിച്ചാ പഴയ ഫോട്ടൊയില്‍
‍ഒരുമിച്ചു നില്‍ക്കുമാ ചേര്‍ച്ചയെ
ഒരുവട്ടം കൂടി നോക്കി
ഒരുമിച്ചൊരു വാക്കു പറയാമിന്നു.....................
പ്രണയം ഹൃദ്യമായമണ്ടത്തരമാണു....

കോങ്കണ്ണന്‍

2007-03-16T23:56:00.000-07:00

ഇടതും വലതും ഒരു പോലെ
ഒന്നിരട്ടിച്ചു രണ്ടായതാണോ?
രണ്ടു പക്ഷവും പറഞ്ഞു
ഞാന്‍ കോങ്കണ്ണനാണെന്നു.....

കാലങ്ങള്‍ക്കിടയില്‍

2007-03-15T23:34:00.000-07:00

ഉത്തരാധുനികതക്കും
വിലക്കയറ്റ കാലത്തിനുമിടയില്‍
‍കാലന്റെ സഞ്ചാരം
പോലീസ്‌ ജീപ്പ്പിലായി
ലോക്കപ്പ്‌ സുരക്ഷിതമല്ലാതതുകൊണ്ടു
ജനം പുഴയില്‍ ചാടി മരിച്ചു

വിലക്കയറ്റകാലം

മായത്തില്‍ അരി ചേര്‍ത്തു വിറ്റു
വിഷത്തിനു വില കയറി
വര്‍ത്തമാനത്തിനു വിലകുറയാതിരിക്കാന്‍
‍മിണ്ടാതെ ഞങ്ങളും.

ആശുപത്രി.....

2007-03-15T00:22:00.000-07:00

അതേ ആശുപത്രി....
നരച്ച ബഞ്ചുകള്‍
‍പൊടിപിടിച്ച കാറ്റാടി മരങ്ങള്‍
‍വിളറിയ സ്റ്റെത്സകൊപ്പുകള്‍
‍ഡെറ്റോളിന്റെ മണം മാത്രമറിയുന്ന
ഇടനാഴികള്‍
‍അതേ ആശുപത്രി.....
ബീഡി പ്പുക തിന്നുന്ന
ആംബൂലന്‍സ്‌ ഡ്രൈവര്‍
‍പരിപ്പുവട മാത്രം പൊരിയുന്ന കാന്റീന്‍
കഫകെട്ടു ബാധിച്ച വീല്‍ചെയറുകള്‍
‍അതേ ആശുപത്രി തന്നെ
അകമൊന്നു മാറിയിട്ടുണ്ടു..അത്ര തന്നെ...
അതുമാത്രം എനിക്കറിയാം.

തിരക്കിനിടയില്‍
മരണം മിസ്സ്‌കാളുകള്‍ അടിക്കും നേരം
ഞാനുമെത്താറുണ്ടു
വെന്റിലേറ്ററിനകത്തു
മരണവും ജീവിതവും
സ്വകാര്യം പറയുന്നതു കേള്‍ക്കാന്‍
‍അപ്പൊഴൊക്കെ എനിക്കും തൊന്നാറുണ്ടു
അതേ ആശുപത്രി...................

ശേഷക്രിയ

2007-03-14T23:46:00.000-07:00

ഉമ്മറക്കോലായില്‍
‍പൊടിപിടിച്ചിരുന്നു ഇന്നലെ വരെ
മരിച്ചു പോയി.......
ശേഷക്രിയക്കൊരു ലോണ്‍ എടുക്കാം
പരേതനെ ജാമ്യമായി ആര്‍ക്കു വേണം?
പാവം അച്ചനുണ്ടോ ഇതറിയുന്നു?
ശവമാണെങ്കില്‍..
ഒരു ലക്ഷം തരാമെന്നു സ്വാശ്രയക്കാര്‍
‍ആത്മാവു കോപിക്കുമോ?
ഇല്ലെങ്കില്‍........

കവിയെ പ്രണയിക്കരുത്‌.

2007-03-14T23:42:00.000-07:00

കവിയെ ഒരിക്കലും

പ്രണയിക്കരുതു.

നിന്റെ പ്രണയത്തെ

വാരികകള്‍ക്കയച്ചു കൊടുക്കും

നിന്റെ പ്രണയത്തെപ്പറ്റി

നിനക്കു മനസ്സിലാവാത്ത

ഭാഷകളില്‍ എഴുതും.

നിന്റെ വികാരങ്ങളെ

ഉത്തരാധുനികതെയിലേക്കു

മാറ്റിയവന്‍ചായ കുടിക്കും.

ഒടുവില്‍ നീ തന്നെ അവനെന്നും

അവന്‍ തന്നെ നീയെന്നും പറഞ്ഞു

മറ്റാരെയെങ്കിലും പ്രണയിക്കും.